* ದಿನೇಶ್ ಎಂ.ಆರ್. ಬೆಂಗಳೂರುದೇಶದ ಬಂಡವಾಳ ಮಾರುಕಟ್ಟೆಯಲ್ಲಿ ಹೂಡಿಕೆ ಮತ್ತು ಉಳಿತಾಯಕ್ಕೆ ಹಲವು ಯೋಜನೆಗಳಿವೆ. ಆದರೆ, ಹೆಣ್ಣುಮಕ್ಕಳ ಉನ್ನತ ಶಿಕ್ಷಣ ಮತ್ತು ವಿವಾಹಕ್ಕೆ ನಿರ್ದಿಷ್ಟ ಯೋಜನೆಗಳಿಲ್ಲ. ಇದನ್ನು ಮನಗಂಡ ಕೇಂದ್ರ ಸರಕಾರ, ಜನವರಿಯಲ್ಲಿ ಮಾರುಕಟ್ಟೆಗೆ ಪರಿಚಯಿಸಿರುವ ಸುಕನ್ಯಾ ಸಮೃದ್ಧಿ ಯೋಜನೆಯು ಹೆಣ್ಣುಮಕ್ಕಳ ಉಜ್ವಲ ಭವಿಷ್ಯಕ್ಕೆ ಆಶಾಕಿರಣ. ಎಸ್ಎಸ್ಐ ಯೋಜನೆಯಲ್ಲಿರುವ ಪ್ರಯೋಜನಗಳ ಕುರಿತು ಇಲ್ಲಿದೆ ಮಾಹಿತಿ.-----
ಹೆಣ್ಣು ಮಗುವಿನ ಶಿಕ್ಷಣ ಮತ್ತು ವಿವಾಹದ ಗುರಿ ಸಾಧನೆಗಾಗಿ ಬ್ಯಾಂಕ್ ಅಥವಾ ಅಂಚೆ ಕಚೇರಿಯ ನಿಶ್ಚಿತ ಠೇವಣಿ ಅಥವಾ ಸಾರ್ವಜನಿಕ ಭವಿಷ್ಯ ನಿಧಿ 'ಪಿಪಿಎಫ್' ಮುಂತಾದ ಸಾಂಪ್ರದಾಯಿಕ ಹೂಡಿಕೆ ಸಾಧನಗಳಲ್ಲಿ ಹಣ ತೊಡಗಿಸಲು ಯೋಚಿಸುತ್ತಿದ್ದೀರಾ? ಕೇಂದ್ರ ಸರಕಾರ ಜನವರಿ 22ರಂದು ಮಾರುಕಟ್ಟೆಗೆ ಪರಿಚಯಿಸಿರುವ 'ಸುಕನ್ಯಾ ಸಮೃದ್ಧಿ ಯೋಜನೆ(ಎಸ್ಎಸ್ವೈ)' ನಿಮ್ಮ ಭವಿಷ್ಯದ ಚಿಂತನೆಗಳಿಗೆ ಉತ್ತಮ ಪರ್ಯಾಯ ಹೂಡಿಕೆ ಸಾಧನವಾಗಲಿದೆ. ಪ್ರಧಾನ ಮಂತ್ರಿ 'ಬೇಟಿ ಬಚಾವೊ ಬೇಟಿ ಪಡಾವೊ' ಕಾರ್ಯಕ್ರಮದ ಉಪಕ್ರಮವಾಗಿ ಪ್ರಧಾನಿ ನರೇಂದ್ರ ಮೋದಿ ಈ ಆಕರ್ಷಕ ಹೂಡಿಕೆ ಯೋಜನೆಯನ್ನು ಅನಾವರಣಗೊಳಿಸಿದ್ದಾರೆ. ಆದಾಯ ತೆರಿಗೆ ಕಾಯ್ದೆಯ ಸೆಕ್ಷನ್ 80ಸಿ ಅಡಿ ಈ ಯೋಜನೆ ತೆರಿಗೆ ವಿನಾಯ್ತಿಗೆ ಒಳಪಡುತ್ತದೆ. ಈ ಯೋಜನೆಗೆ ತೊಡಗಿಸುವ ಹಣವು ತೆರಿಗೆ ಮುಕ್ತ ಎಂದು ಬಜೆಟ್ನಲ್ಲಿ ಘೋಷಿಸಲಾಗಿದೆ.
ಸುಕನ್ಯಾ ಹೆಚ್ಚು ಸುಂದರ...'ಸುಕನ್ಯಾ ಸಮೃದ್ಧಿ ಯೋಜನೆ' ಪಿಪಿಎಫ್ಗಿಂತ ಹೆಚ್ಚು ಆಕರ್ಷಕ. ಏಕೆಂದರೆ ಇದಕ್ಕೆ ಸಿಗುವ ಬಡ್ಡಿ ಆದಾಯ ಅಧಿಕ. ಈ ಬಡ್ಡಿ ಆದಾಯವನ್ನು ಸರಕಾರಿ ಬಾಂಡ್ಗಳು ನೀಡುವ ಆದಾಯಕ್ಕೆ ಸಂಪರ್ಕ ಕಲ್ಪಿಸಲಾಗಿದೆ. ಹಾಗಾಗಿ, ಅವು ಸದಾ ಉತ್ತಮ ವರಮಾನವನ್ನೇ ನೀಡುತ್ತವೆ. ಆದರೆ, ಪಿಪಿಎಫ್ಗೆ ಸಿಗುವ ಬಡ್ಡಿ ಆದಾಯವು 10 ವರ್ಷಗಳ ಸರಕಾರಿ ಬಾಂಡ್ಗಳಿಗಿಂತ 25 ಮೂಲಾಂಕ ಮಾತ್ರ ಹೆಚ್ಚಿದ್ದರೆ, 'ಸುಕನ್ಯಾಸಮೃದ್ಧಿ ಯೋಜನೆ'ಯ ಹೂಡಿಕೆಗೆ 75 ಮೂಲಾಂಕಗಳ ಹೆಚ್ಚಿನ ಬಡ್ಡಿ ಸಿಗುತ್ತದೆ. ಪ್ರಸಕ್ತ ಸಾಲಿನಲ್ಲಿ(2014 ಏಪ್ರಿಲ್ 1ರಿಂದ 2015 ಮಾರ್ಚ್ 31ರ ವರೆಗೆ) ಪಿಪಿಎಫ್ಗೆ ಶೇ.8.7 ಬಡ್ಡಿ ಆದಾಯ ಸಿಕ್ಕರೆ, ಎಸ್ಎಸ್ವೈಗೆ ಶೇ.9.1 ಬಡ್ಡಿ ವರಮಾನ ಸಿಗಲಿದೆ.
ಖಾತೆ ತೆರೆಯಲು ಮಾರ್ಚ್ 31ರ ವರೆಗೆ ಅವಕಾಶ'ಸುಕನ್ಯಾಸಮೃದ್ಧಿ ಯೋಜನೆ' ಪಿಪಿಎಫ್ಗಿಂತ ಹೆಚ್ಚಿನ ವರಮಾನ ನೀಡುವುದರಲ್ಲಿ ಎರಡು ಮಾತಿಲ್ಲ. ಆದರೆ ಇದು ಎಲ್ಲ ಹೆಣ್ಣು ಮಕ್ಕಳಿಗೆ ಲಭ್ಯವಿಲ್ಲ. 10 ವರ್ಷದವರೆಗಿನ ಹೆಣ್ಣು ಮಕ್ಕಳ ಹೆಸರಿನಲ್ಲಿ ಮಾತ್ರ ಪೋಷಕರು ಅಥವಾ ಪಾಲಕರು ಎಸ್ಎಸ್ವೈ ಖಾತೆ ತೆರೆಯಲು ಅವಕಾಶವಿದೆ. ಆದರೆ ಈ ವರ್ಷಕ್ಕೆ ಮಾತ್ರ ಅನ್ವಯವಾಗುವಂತೆ ಸರಕಾರ ವಯೋಮಿತಿಯಲ್ಲಿ 1 ವರ್ಷ ಸಡಿಲಿಕೆ ನೀಡಿದೆ. 2015 ಡಿಸೆಂಬರ್ 1ರವರೆಗೆ ಅನ್ವಯವಾಗುವಂತೆ 11 ವರ್ಷದವರೆಗಿನ ಹೆಣ್ಣು ಮಗುವಿನ ಹೆಸರಿನಲ್ಲಿ ಎಸ್ಎಸ್ವೈ ಖಾತೆ ತೆರೆಯಲು ಮುಕ್ತ ಅವಕಾಶ ನೀಡಲಾಗಿದೆ. 2003 ಡಿಸೆಂಬರ್ 2ಕ್ಕಿಂತ ಮುನ್ನ ಜನಿಸಿದ ಹೆಣ್ಣು ಮಗು ಈ ಯೋಜನೆಗೆ ಅರ್ಹತೆ ಹೊಂದುವುದಿಲ್ಲ. ಹಾಗಾಗಿ, ಸಾರ್ವಜನಿಕರು ಸರಕಾರ ನೀಡಿರುವ ಈ ಅವಕಾಶವನ್ನು ಸದುಪಯೋಗ ಪಡಿಸಿಕೊಳ್ಳಲು ಮುಂದಾಗುವುದು ಜಾಣತನ. ಪ್ರಸಕ್ತ ಆರ್ಥಿಕ ವರ್ಷ ಮಾರ್ಚ್ 31ರ ವರೆಗೆ ಇರುತ್ತದೆ. ಈ ಅವಧಿಯೊಳಗೆ ಪೋಷಕರು ಮತ್ತು ಪಾಲಕರು ತಮ್ಮ ಹೆಣ್ಣು ಮಗುವಿನ ಹೆಸರಿನಲ್ಲಿ ಸುಕನ್ಯಾ ಸಮೃದ್ಧಿ ಯೋಜನೆಯ ಖಾತೆ ತೆರೆಯಲು ಮುಂದಾಗುವುದು ಸೂಕ್ತ. ಇದರಿಂದ 1 ವರ್ಷದ ಸಂಪೂರ್ಣ ಪ್ರಯೋಜನಗಳು ಮಗುವಿಗೆ ಸಿಗುತ್ತದೆ.
ಖಾತೆ ತೆರೆಯುವುದು ಹೇಗೆ?ಯಾವುದೇ ಅಂಚೆ ಕಚೇರಿ ಅಥವಾ ಸಾರ್ವಜನಿಕ ರಂಗದ ಬ್ಯಾಂಕ್ಗಳ ನಿಯೋಜಿತ ಶಾಖೆಗಳಲ್ಲಿ ಪೋಷಕರು ತಮ್ಮ ಹೆಣ್ಣು ಮಕ್ಕಳ ಹೆಸರಿನಲ್ಲಿ ಖಾತೆ ತೆರೆಯಬಹುದು. ಆರ್ಥಿಕ ವರ್ಷದಲ್ಲಿ ಕನಿಷ್ಠ ಹೂಡಿಕೆ 1 ಸಾವಿರ ರೂ. ಹಾಗೂ ಗರಿಷ್ಠ 1.5 ಲಕ್ಷ ರೂ. ಹಣ ತೊಡಗಿಸಬಹುದು. ಖಾತೆ ತೆರೆದ ಬಳಿಕ 14 ವರ್ಷಗಳ ಅವಧಿವರೆಗೆ ಠೇವಣಿ ಹೂಡಿಕೆ ಮಾಡಬಹುದು. ಯಾವುದೇ ಆರ್ಥಿಕ ವರ್ಷದಲ್ಲಿ ಖಾತೆಗೆ ಕನಿಷ್ಠ ಬಾಕಿ ಕಾಪಾಡದಿದ್ದರೆ ಆ ವರ್ಷಕ್ಕೆ 50 ರೂ. ದಂಡ ವಿಧಿಸಲಾಗುತ್ತದೆ. ಯಾವುದೇ ಪೋಷಕ ಅಥವಾ ಪಾಲಕ ತನ್ನ ಎರಡು ಹೆಣ್ಣು ಮಕ್ಕಳಿಗೆ ಸುಕನ್ಯಾ ಸುಮೃದ್ಧಿ ಯೋಜನೆಯ ಖಾತೆ ತೆರೆಯಲು ಅವಕಾಶವಿದೆ. ಆದರೆ ಎರಡೂ ಖಾತೆಗಳ ಸಂಯೋಜಿತ ಹೂಡಿಕೆಯ ಮೊತ್ತ ವರ್ಷದಲ್ಲಿ 1.5 ಲಕ್ಷ ರೂ. ದಾಟಬಾರದು. ಹೆಣ್ಣು ಮಗುವಿಗೆ 21 ವರ್ಷ ತುಂಬಿದಾಗ ಎಸ್ಎಸ್ವೈ ಖಾತೆಯ ಅವಧಿ ಪಕ್ವ(ಪೂರ್ಣ)ವಾಗುತ್ತದೆ. ಆಕೆಗೆ 18 ವರ್ಷ ತುಂಬಿದಾಗ ಅಥವಾ ವಿವಾಹವಾದ ಬಳಿಕ ಖಾತೆಯಲ್ಲಿ ತೊಡಗಿಸಿರುವ ಹಣದ ಶೇ.50 ಭಾಗವನ್ನು ಹಿಂಪಡೆಯಲು ಅವಕಾಶವಿದೆ.
ಎಸ್ಎಸ್ವೈ ಏಕೆ ಅರ್ಥಪೂರ್ಣ?ಹೆಣ್ಣು ಮಗುವಿನ ಹೆಸರಿನಲ್ಲಿ ಪೋಷಕರು ಹೂಡಿಕೆ ಮಾಡುತ್ತಾರೆ ಎಂದರೆ ಅದರಲ್ಲಿ ಒಂದು ನಿರ್ದಿಷ್ಟ ಉದ್ದೇಶ ಅಡಕವಾಗಿರುತ್ತದೆ. ಆ ಉದ್ದೇಶ ಸಾಧನೆಗೆ ಎಸ್ಎಸ್ವೈ ಪಕ್ಕಾ ಯೋಜನೆಯಾಗಿ ಕಾಣುತ್ತಿದೆ. ಆದರೆ 15 ವರ್ಷಗಳ ಪಿಪಿಎಫ್ ಯೋಜನೆಯಲ್ಲಿ ನೀವು ಹೂಡಿಕೆ ಮಾಡುತ್ತಾ ಹೋದರೆ, ದೀರ್ಘಾವಧಿವರೆಗೆ ಕಾಯಬೇಕು. 15 ವರ್ಷಗಳ ತರುವಾಯ ಪಿಪಿಎಫ್ ಹಣ ಸಿಕ್ಕಾಗ ಕೆಲವರು ನಿವೇಶನ ಅಥವಾ ಮನೆ ಖರೀದಿಸಬಹುದು. ಮತ್ತೆ ಕೆಲವರು ಮಗಳ ವಿವಾಹ ನೆರವೇರಿಸಬಹುದು. ಆದರೆ ಈ ಯೋಜನೆ ನಿರ್ದಿಷ್ಟ ಗುರಿ ಸಾಧನೆಗೆ ನೆರವಾಗುವುದಿಲ್ಲ. ಅದೇ ಎಸ್ಎಸ್ವೈನಲ್ಲಿ ಹಣ ತೊಡಗಿಸಿದರೆ, ಮಗಳ ಉನ್ನತ ಶಿಕ್ಷಣ, ವಿವಾಹ, ಮನೆ ಖರೀದಿ, ಬೆಳ್ಳಿ ಬಂಗಾರದ ಒಡವೆ ಮುಂತಾದ ಅರ್ಥಪೂರ್ಣ ಕಾರ್ಯಗಳಿಗೆ ನೆರವಾಗಿ ಬರುತ್ತದೆ. ಆದರೆ ಕೇಂದ್ರ ಸರಕಾರ, ಈ ಯೋಜನೆಗೆ ಬರುವ ಹಣವನ್ನು ಸಮರ್ಪಕವಾಗಿ ನಿರ್ವಹಿಸಬೇಕಷ್ಟೆ ಎನ್ನುತ್ತಾರೆ ಹಣಕಾಸು ಯೋಜಕರು ಮತ್ತು ವಿಶ್ಲೇಷಕರು.
ಹಣಕಾಸು ತಜ್ಞರ ಸಲಹೆ ಏನು?ಹೆಣ್ಣು ಮಗುವಿನ ವಯಸ್ಸು 10 ಆದಾಗ ದಂಪತಿ ಎಸ್ಎಸ್ವೈ ಯೋಜನೆಯ ಖಾತೆಗೆ ಪ್ರತಿ ವರ್ಷ 1.5 ಲಕ್ಷ ರೂ. ತೊಡಗಿಸುತ್ತಾ ಬಂದರೆ 11 ವರ್ಷಗಳಲ್ಲಿ ಹೂಡಿಕೆ ಮೊತ್ತ 28.89 ಲಕ್ಷ ರೂ.ಗೆ ಬೆಳೆಯುತ್ತದೆ. ಆಗ ಮಗುವಿಗೆ 21 ವರ್ಷ ತುಂಬಿರುತ್ತದೆ. ಒಂದು ವೇಳೆ ಮಗುವಿನ ವಯಸ್ಸು 5 ವರ್ಷವಿದ್ದಾಗಲೇ ಈ ಯೋಜನೆಯಲ್ಲಿ ವಾರ್ಷಿಕ 1.5 ಲಕ್ಷ ರೂ. ಹಣ ತೊಡಗಿಸುತ್ತಾ ಬಂದರೆ ಆಕೆಗೆ 19 ವರ್ಷ ತುಂಬರುವ ವೇಳೆಗೆ ಹೂಡಿಕೆಯ ಮೊತ್ತ 42.88 ಲಕ್ಷ ರೂ.ಗೆ ಏರಿಕೆ ಆಗಿರುತ್ತದೆ. ಇದು ಪೋಷಕರ ಪಾಲಿಗೆ ಆಕರ್ಷಕ ಎನಿಸಬಹುದು. ಆದರೆ, 14 ವರ್ಷಗಳ ಬಳಿಕ ಉದಾಹರಣೆಗೆ 2031ರ ಹೊತ್ತಿಗೆ ಹೆಣ್ಣು ಮಗುವಿನ ಶಾಲಾ ಶಿಕ್ಷಣ ವೆಚ್ಚ ದುಬಾರಿಯಾಗಿರುತ್ತದೆ. ಹಾಗಾಗಿ, ಹೂಡಿಕೆ ಮಾಡುವಾಗ ಇರುವ ಬಡ್ಡಿದರ ಮೌಲ್ಯ 14 ವರ್ಷಗಳ ಬಳಿಕ ಕುಸಿದಿರುತ್ತದೆ. ಎಸ್ಎಸ್ವೈ ಅನ್ನು ಇತರೆ ಹೂಡಿಕೆ ಸಾಧನಗಳೊಂದಿಗೆ ಸಂಯೋಜಿಸಿ, ಬಳಸುವುದು ಜಾಣತನ. ಅಂದರೆ ಮಗಳ ಭವಿಷ್ಯದ ಗುರಿಗಳಿಗೆ ಎಸ್ಎಸ್ವೈ ಜತೆ ಈಕ್ವಿಟಿ ನಿಧಿಯಂತಹ ಸಾಧನಗಳಲ್ಲೂ ಹೂಡಿಕೆ ಮಾಡಿ, ಎರಡರಿಂದ ಬರುವ ಆದಾಯವನ್ನು ನಿಶ್ಚಿತ ಗುರಿಗೆ ಬಳಸುವ ಗುರಿ ಇಟ್ಟುಕೊಳ್ಳಬೇಕು ಎಂದು ಸಲಹೆ ನೀಡುತ್ತಾರೆ ಹಣಕಾಸು ತಜ್ಞರು.
ಹೆಣ್ಣು ಮಕ್ಕಳ ಉಜ್ವಲ ಭವಿಷ್ಯದ ಗುರಿಗಳಿಗೆ ಸುಕನ್ಯಾ ಸಮೃದ್ಧಿ ಯೋಜನೆವಿದೇಶಗಳಲ್ಲಿ ಉನ್ನತ ಶಿಕ್ಷಣ ಈಗಲೇ ಜನಸಾಮಾನ್ಯರ ಪಾಲಿಗೆ ದುಬಾರಿ. ಮುಂದಿನ 10 - 15 ವರ್ಷಗಳ ನಂತರ ಅದು ಕೈಗೆಟುಕದ ಸರಕಾಗಿ ಪರಿಣಮಿಸುವುದರಲ್ಲಿ ಎರಡು ಮಾತಿಲ್ಲ. ಹಾಗಾಗಿ, ಶ್ರೀಸಾಮಾನ್ಯ ಹೂಡಿಕೆದಾರರು ಒಂದೇ ಹೂಡಿಕೆ ಯೋಜನೆಯನ್ನು ಅವಲಂಬಿಸಿದೆ ಅಧಿಕ ವರಮಾನ ಸಿಗುವ ಪರ್ಯಾಯ ಹೂಡಿಕೆ ಯೋಜನೆಗಳಲ್ಲಿ ಹೂಡಿಕೆ ಮಾಡುವುದು ಸೂಕ್ತ ಎಂಬುದು ಅವರ ತರ್ಕ.
ಟಾಪ್ 5...ತೆರಿಗೆ ಉಳಿತಾಯದ ಪ್ರಮುಖಜನಪ್ರಿಯ ಹೂಡಿಕೆ ಯೋಜನೆಗಳು
ಸಾಧನ ಅವಧಿ ಸರಾಸರಿ ಬಡ್ಡಿ ಆದಾಯ
1. ಪಿಪಿಎಫ್ 15 ವರ್ಷ 8.7%
2. ಇಎಲ್ಎಸ್ಎಸ್ ನಿಧಿ 5 ವರ್ಷ 15.7%
3. ಯುಲಿಪ್ಸ್ 5 ವರ್ಷ 7.2-11.8%
4. ಎನ್ಎಸ್ಸಿ, ಬ್ಯಾಂಕ್ ಎಫ್ಡಿ 5 ವರ್ಷ 8.5-9.75%
5. ವೈಯಕ್ತಿಕ ಪಿಎಫ್ 1 ವರ್ಷ 8.5%
ಬಿ ಸ್ಮಾರ್ಟ್....
ಅವಳಿ ಹೆಣ್ಣು ಮಕ್ಕಳಿದ್ದರೆ 3ನೇ ಮಗುವಿಗೂ ಖಾತೆಸಣ್ಣ ಉಳಿತಾಯ ಯೋಜನೆಯಾಗಿರುವ ಎಸ್ಎಸ್ವೈನಲ್ಲಿ ಪ್ರತಿ ಹೆಣ್ಣು ಮಗುವಿಗೆ ಒಂದೇ ಖಾತೆ ತೆರೆಯಲು ಮಾತ್ರ ಅವಕಾಶ. ಪ್ರಸಕ್ತ ಸಾಲಿಗೆ ಮಾತ್ರ ಅನ್ವಯವಾಗುವಂತೆ ಮಗು 02 ಡಿಸೆಂಬರ್ 2013ರಂದು ಅಥವಾ ಅದರ ನಂತರ ಜನಿಸಿರಬೇಕು. ಅಂದರೆ ವಯಸ್ಸು 10 ವರ್ಷದೊಳಗಿರಬೇಕು. ಪೋಷಕರಿಗೆ ಅವಳಿ ಹೆಣ್ಣು ಮಕ್ಕಳಿದ್ದರೆ, ಮೂರನೇ ಹೆಣ್ಣು ಮಗುವಿಗೂ ಖಾತೆ ತೆರೆಯಲು ಅವಕಾಶವಿದೆ. ಖಾತೆ ತೆರೆಯುವ ಹೆಣ್ಣು ಮಗುವಿಗೆ ಪಾಸ್ ಬುಕ್ ನೀಡಲಾಗುತ್ತದೆ. ಹೆಣ್ಣು ಮಗುವಿನ ಹೆಸರಿನಲ್ಲಿ ಸುಕನ್ಯಾ ಸಮೃದ್ಧಿ ಖಾತೆ ತೆರೆಯಲು ಜನನ ಪ್ರಮಾಣ ಪತ್ರ, ವಿಳಾಸ, ಗುರುತಿನ ದಾಖಲೆ ಒದಗಿಸುವುದು ಕಡ್ಡಾಯ. ದೇಶಾದ್ಯಂತ ಖಾತೆಯ ವರ್ಗಾವಣೆಗೆ ಅವಕಾಶವಿದೆ.
ಒಳನೋಟ....
ಎಸ್ಎಸ್ವೈ ಆದಾಯ ವಿಶೇಷ ಏನು?ದೇಶದ ಹೆಣ್ಣುಮಕ್ಕಳ ಶಿಕ್ಷಣ, ವಿವಾಹ ಮತ್ತಿತರ ಮಹತ್ತರ ಕಾರ್ಯಗಳಿಗೆ ಶ್ರೀಸಾಮಾನ್ಯ ಪೋಷಕರಿಗೆ ಹಣಕಾಸಿನ ತೊಂದರೆ ಎದುರಾಗಬಾರದು ಎಂಬ ಉದ್ದೇಶದಿಂದ ಪ್ರಧಾನಿ ನರೇಂದ್ರ ಮೋದಿ ಅವರು ಜನವರಿ 22ರಂದು ಪರಿಚಯಿಸಿದ ವಿಶೇಷ ಠೇವಣಿ ಯೋಜನೆಯೇ 'ಸುಕನ್ಯಾ ಸಮೃದ್ಧಿ ಖಾತೆ'. ಹೆಣ್ಣು ಮಗುವಿನ ಹೆಸರಿನಲ್ಲಿ ಖಾತೆ ತೆರೆದು ಇಡಲಾಗುವ ಹಣಕ್ಕೆ ನೀಡಲಾಗುವ ಬಡ್ಡಿ ಆದಾಯವು ತೆರಿಗೆ ಮುಕ್ತವಾಗಿರುತ್ತದೆ. ಸರಕಾರ ಪ್ರತಿವರ್ಷ ಬಡ್ಡಿ ಆದಾಯ ಪ್ರಕಟಿಸುತ್ತದೆ. ಈ ವರ್ಷಕ್ಕೆ ಶೇ.9.1 ಬಡ್ಡಿದರ ಪ್ರಕಟವಾಗಿದೆ. ಪ್ರತಿ ವರ್ಷವೂ ಬಡ್ಡಿ ಆದಾಯ ಕೂಡಿಕೆಯಾಗುತ್ತಾ ಹೋಗುತ್ತದೆ. 10 ವರ್ಷ ತುಂಬಿದ ಬಳಿಕ ಹೆಣ್ಣು ಮಗುವೇ ಖಾತೆ ನಿರ್ವಹಿಸಬಹುದು.
ಪ್ರಶ್ನೋತ್ತರ....
ಎಸ್ಎಸ್ವೈ ಖಾತೆ ಮೆಚ್ಯೂರಿಟಿಯಾದ ನಂತರ ಹಣ ಹಿಂಪಡೆಯದಿದ್ದರೆ ಬಡ್ಡಿ ವರಮಾನ ಸಿಗುತ್ತಾ?ಹೆಣ್ಣುಮಗುವಿನ ಹೆಸರಿನಲ್ಲಿ ತೆರೆಯುವ ಖಾತೆ 14 ವರ್ಷ ಪೂರ್ಣಗೊಂಡ ಬಳಿಕ ಅಥವಾ ಖಾತೆದಾರಳಿಗೆ 21 ವರ್ಷ ತುಂಬಿದ ಬಳಿಕ ಹೂಡಿಕೆ ಮತ್ತು ಬಡ್ಡಿ ಆದಾಯ ಸೇರಿದ ಒಟ್ಟು ಹಣವನ್ನು ಹಿಂಪಡೆಯದಿದ್ದರೆ, ಆ ಹಣ ಕಾಲಕಾಲಕ್ಕೆ ಬಡ್ಡಿ ಆದಾಯಕ್ಕೆ ಒಳಪಡುತ್ತದೆ. ಯೋಜನೆಗೆ ನಿಗದಿಪಡಿಸುವ ಬಡ್ಡಿ ವರಮಾನ ಸಿಗುತ್ತದೆ. ಠೇವಣಿ ಮತ್ತು ಬಡ್ಡಿ ಸಂಪೂರ್ಣ ತೆರಿಗೆ ಮುಕ್ತವಾಗಿರುತ್ತದೆ.
ತಿಳಿ-ನಲಿಸುಕನ್ಯಾ ಸಮೃದ್ಧಿ ಯೋಜನೆಯ ಸಮಗ್ರ ಮಾಹಿತಿ ಅರಿಯಲು ಸಂಪರ್ಕಿಸಬಹುದಾದ ವೆಬ್ಸೈಟ್
www.sukanyasamriddhiaccountyojana.in/
ಅಂಕಿ-ನೋಟ......
337.793 ಶತಕೋಟಿ ಡಾಲರ್ಮಾರ್ಚ್ 6ರವರೆಗೆ ಅನ್ವಯವಾಗುವಂತೆ ಭಾರತ ಹೊಂದಿರುವ ವಿದೇಶಿ ವಿನಿಮಯ ಸಂಗ್ರಹ
**
ಬೆಂಗಳೂರು:
